2022: Ilustradôrs e ilustradoris contemporanis in Friûl tal Strolic Furlan e tal Lunari de Filologjiche

Joibe ai 25 di Novembar, dì di Sante Catarine, si presente come par tradizion il “Strolic Furlan”, la storiche riviste de Societât Filologjiche Furlane, rivade a la anade numar 103. Il Strolic pal 2022, par cure di Dani Pagnucco al sarà presentࣗât di bande di Mario Turello, cun leturis di Maria Dolores Miotto e Danilo D’Olivo, a lis 5 sore sere in direte streaming sul sît www.filologicafriulana.it. Chest an il Strolic al à par argoment “Ilustradoris e ilustradôrs contemporanis in Friûl”: 288 pagjinis di contis insioradis, in cuviertine e mês par mês, dai “colôrs da la sperance” di grafics e ilustradôrs furlans che a àn fate furtune fûr dai confins de regjon. La cuviertine e je di Federica Pagnucco, la cuarte di cuviertine di Alessandra D’Este. I artiscj che a àn colaborât a son ancje Emanuele Bertossi, Alessandra Cimatoribus, Oriana Cocetta, Sara Colautti, Alessandro D’Osualdo, Maria Ellero, Annalisa Gasparotto, Barbara Jelenkovich, Anna Mattiuzzo, Marisa Moretti, Pietro Nicolaucich, Silvia Pignat, Luisa Tomasetig, Pia Valentinis. La introduzion artistiche e je a firme di Gabriella Bucco.

In ducj i mês si cjatin lis flabis dai fradis Grimm tal adatament furlan di Claudio Romanzin, Gianni Colledani e i siei personaçs di Clausîet di une volte, biel che Antonino Danelutto nus conte parts di Scluse e de Val Racolane; nol mancje l’istrionic Agnul Floramo cu lis sôs contis inmagantis.

Come par tradizion, a son i tescj di Giannino Angeli, Benvenuto Castellarin, Novella Del Fabbro, Rem Spicemei, Celestino Vezzi e tancj altris: in dut i autôrs a son 74. A cjatin spazi ancje i scrits dai arlêfs dai cors pratics di lenghe furlane, che in tancj a scrivin te lôr varietât, e i emigrâts furlans che ogni mês nus regalin une lôr conte. Chest an si à dât dongje ancje Lenart Gjavedon, un corsist dal cors pratic online, novitât de ufierte formative de Filologjiche, che nus scrîf di Buenos Aires. A son ancje presentadis lis poesiis che a àn vinçût un premi tai tancj concors inmaneâts in Friûl e fûr dal Friûl.

La Societât Filologjiche Furlane e presente ancje il Lunari pal 2022, stampât cul jutori di Civibank, che al presente il stes implant iconografic dal Strolic. Cun di plui inte “cjanive de Filologjiche” in Palaç Mantica, sede de Societât in via Manin 18 a Udin, dai 26 di Novembar ai 23 di Dicembar si podarà viodi la mostre “Ilustradoris e ilustradôrs contemporanis in Friûl”, par cure di Gabriella Bucco e Dani Pagnucco: di lunis a vinars des 10 a misdì e des 4 a lis 6 dopomisdì, cun jentrade libare e oblic dal green pass.